ГОСПОДИ ИИСУСЕ ХРИСТЕ, СЫНЕ БОЖИЙ, ПОМИЛУЙ НАС ГРЕШНЫХ!
Акафист ко святому Причащению
Кондак 1.
Избранный Женише душ и сердец, вочеловечением Своим и смертию на Кресте, обручивый Себе на веки весь род человечь, и давый нам в залог вечныя жизни самое пречистое Тело и Кровь Свою, се по гласу Твоему и аз, недостойный, дерзая прихожду к божественной трапезе Твоей и, поражен величием ея, вопию:
Иисусе, Боже сердца моего, прииди и соедини мя с Тобою на веки.
Икос 1.
Ангела Твоего к провидцу Исаии со углем горящим от алтаря небеснаго послал еси, во еже очистити тем устне его, егда видев Тя, седяща на престоле, о нечистоте своей сокрушашеся; аз же, оскверненный душею и телом, како дерзну приступити ко причащению Божественных Твоих Таин, аще не Ты Сам очистиши мя свыше? Темже из глубины души вопию Ти:
Иисусе Всеблагий, коснися огнем благодати Твоея и моих нечистых устен; Иисусе, попали терние моих многих прегрешений.
Иисусе, созижди во мне сердце чисто, и обнови во утробе моей дух правый; Иисусе, изведи из темницы страстей бедную душу мою.
Иисусе, потреби во мне нечистыя помыслы и злая похотения; Иисусе, направи слабыя стопы моя на путь заповедей Твоих.
Иисусе, Боже сердца моего, прииди и соедини мя с Тобою на веки.
Кондак 2.
Жела́нием возжела́вый я́сти со ученики́ после́днюю пред страда́нием Твои́м па́сху, да препода́си и́м, среди́ ея́, после́дний и наибо́льший зало́г любви́ Твоея́, пре́жде двою́ дню́ предпосла́л еси́ два́ от ни́х во Иерусали́м, да ше́дше угото́вают ю́. Поуча́яся отсю́да, ка́ко и на́м подоба́ет благовре́менне уготовля́ти себе́ к снеде́нию на́шея Боже́ственныя Па́схи, си́речь Те́ла и Кро́ви Твоея́, благода́рственно зову́ Ти́: Аллилу́ия.
Икос 2.
«Иззу́й сапоги́ от но́гу твое́ю, земля́ бо, на не́йже стои́ши, свята́ е́сть», — ре́кл еси́ Моисе́ю из купины́, горе́вшей и несгора́вшей, от неви́димаго во о́ной прису́тствия Твоего́. Сосу́д с Боже́ственным Те́лом и Кро́вию Твое́ю вои́стину бо́лее и святе́е неопали́мыя купины́ е́сть; а́з же пе́рстен, нечи́ст, про́дан под гре́х. Те́мже со смире́нием и ве́рою вопию́ Ти́:
Иису́се Всемогу́щий, совлеки́ мя́ ве́тхаго челове́ка с дея́ньми его́; Иису́се, умертви́ се́мя тли́, во мне́ гнездя́щееся.
Иису́се, расто́ргни у́зы греха́, и́миже связа́ мя́ вра́г; Иису́се пода́ждь ми́ се́рдце смире́нно и ду́х сокруше́н.
Иису́се, отжени́ от мене́ искуше́ния и собла́зны; Иису́се, утверди́ мя́ в ве́ре и любви́ к Тебе́.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 3.
«Отцы́ ва́ши ядо́ша ма́нну в пусты́ни и умро́ша; Аз е́смь Хле́б, сходя́й с небесе́, да а́ще кто́ я́ст от него́, жи́в бу́дет во ве́ки; и Хле́б, его́же Аз да́м, Пло́ть Моя́ е́сть, ю́же Аз да́м за живо́т ми́ра», — ре́кл еси́ иуде́ом, иска́вшим ви́дети от Тебе́ зна́мение с небеси́, подо́бное ма́нне Моисе́евой. Его́ же мы́ слы́шаще и сбытие́ предрече́ннаго ви́дяще, со стра́хом зове́м: Аллилу́ия.
Икос 3.
«Воста́в с ве́чери, — я́коже повеству́ет святы́й Иоа́нн, — и препоя́сався ле́нтием, умы́л еси́ но́ги ученико́мъ», науча́я си́м, да не приступа́ем к Боже́ственней трапе́зе Твое́й, неомы́тые слеза́ми покая́ния, во греха́х на́ших. Ощуща́я презе́льную ну́жду сего́ та́инственнаго омове́ния и ску́дость сле́з ожесточе́ннаго се́рдца моего́, с Петро́м вопию́ Ти́:
Иису́се Преблаги́й, Са́м ми́ умы́й не но́зе то́кмо, но и ру́це и главу́; Иису́се, обнажи́ предо мно́ю бе́здну душе́внаго моего́ растле́ния.
Иису́се, разве́рзи во мне́ исто́чник сокруше́ния серде́чнаго; Иису́се, ороси́ мя́ ка́плями Твоего́ милосе́рдия.
Иису́се, обве́й мя́ стра́хом суда́ и му́к ве́чных; Иису́се, возбуди́ со́весть, спя́щую во мне́, и укрепи́ гла́с ея́.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 4.
«Не се́й ли е́сть Иису́с, сы́н Ио́сифов, Его́же мы́ зна́ем отца́ и ма́терь? Ка́ко у́бо глаго́лет Се́й, я́ко с небесе́ снидо́х? И ка́ко мо́жет да́ти на́м Пло́ть Свою́ я́сти?» — глаго́лаху между́ собо́ю жи́дове, услы́шавше о пресла́вном обеща́нии Твое́м да́тися в сне́дь ве́рным, не ве́дуще, по окамене́нию серде́ц свои́х, со смире́нием ве́ровати и взыва́ти к Тебе́: Алли́луия.
Икос 4.
«Аще не сне́сте Пло́ти Сы́на Челове́ческаго и не пие́те Кро́ве Его́, живота́ не и́мате в себе́», — провеща́л еси́ ко́сным во е́же ве́ровати иуде́ом, е́же сло́во же́стоко к слы́шанию показа́ся и не́киим от учени́к Твои́х, неве́дущим еще́ та́ин Ца́рствия Бо́жия. Мы́ же, озаре́нные све́том Ева́нгелия и открове́нным лице́м Боже́ственную сла́ву Твою́ зря́ще, с ве́рою и любо́вию зове́м Ти́:
Иису́се, вся́ моги́й вели́чеством си́лы и держа́вы Твоея́; Иису́се, творя́й и соверша́яй па́че, не́же мо́жем разуме́ти и помы́слити.
Иису́се, ма́нну с не́ба, не́когда в зна́мение настоя́щаго та́инства, одожди́вый; Иису́се, к прообразова́нию того́жде, во́ду из ка́мене источи́вый.
Иису́се, о́блак кра́стелей в напита́ние а́лчущим в пусты́не иуде́ом посла́вый; Иису́се, пред о́чию сами́х сумня́щихся иуде́ев, пятию́ хле́бы пя́ть ты́сящ наро́да насы́тивый.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 5.
«Яду́щим на ве́чери ученико́м, прие́м хле́б, благослови́в и преломи́в, по́дал еси́ и́м, ре́к: приими́те, яди́те, сие́ е́сть Те́ло Мое́, за вы́ ломи́мое, во оставле́ние грехо́в; пото́м же ча́шу пода́в, ре́кл еси́: пи́йте от нея́ вси́, сия́ е́сть Кро́вь Моя́, за вы́ излива́емая, во оставле́ние грехо́въ». — Сему́ боже́ственному и пресла́дкому гла́су вне́млюще, со благодаре́нием зове́м: Аллилу́ия.
Икос 5.
«Яды́й Мою́ Пло́ть и пия́й Мою́ Кро́вь во Мне́ пребыва́ет и Аз в не́м; то́й и́мать живо́т ве́чный и Аз воскрешу́ его́ в после́дний де́нь», си́ е́сть в воскресе́ние живота́ и блаже́нства. Сего́ у́бо вожделе́ннаго воскресе́ния в живо́т ища́ сподо́битися, из глубины́ души́ вопию́ Ти́:
Иису́се, прибли́зися ко и́щущему соедине́ния с Тобо́ю; Иису́се, вни́ди во утро́бу, во вся́ соста́вы и вся́ ко́сти моя́.
[Иису́се, бу́ди све́том моего́ помраче́ннаго ума́;] Иису́се, напо́лни Собо́ю ненасы́тимую все́м ми́ром бе́здну моего́ се́рдца.
Иису́се, веща́й гла́сом моея́ со́вести; Иису́се, дви́жи и управля́й мое́ю во́лею.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 6.
«Ами́нь, ами́нь, глаго́лю ва́м: еди́н от ва́с преда́ст Мя́», — ре́кл еси́ в ско́рби ду́ха ученико́м Твои́м на ве́чери. Они́ же, а́ще и чи́сти от за́мысла преда́ния, «еда́ а́з е́смь», вопроша́ху Тя́ ки́йждо, показу́я си́м глубину́ своего́ смиренному́дрия. Аз же, что́ реку́ Ти́, седми́жды на де́нь па́даяй и изменя́яй Тебе́? Оба́че Ты́ Са́м соблюди́ мя́, да не отпаду́ в коне́ц, взыва́я Ти́ благода́рне: Аллилу́ия.
Икос 6.
«Якоже розга́ не мо́жет плода́ твори́ти о себе́, а́ще не бу́дет на лозе́, та́ко и вы́, а́ще во Мне́ не пребу́дете; а и́же бу́дет во Мне́ и Аз в не́м, то́й сотвори́т пло́д мно́гъ», — си́це, тайноде́йствуя, поуча́л еси́ возлю́бленные ученики́ Твоя́ на пути́ в Гефсима́нию. Сему́ у́бо наставле́нию вне́мля, и ве́дый не́мощь естества́ моего́ без благода́ти Твое́й, приле́жно вопию́ Ти́:
Иису́се, пренебе́сный де́лателю, Са́м мя́ всади́ в живоно́сный вертогра́д Тво́й; Иису́се, лоза́ и́стинная, прикрепи́ мя́ к Тебе́, я́ко ро́згу ди́кую.
Иису́се, ко́реню неизсыха́ющий, испо́лни мя́ со́ком жи́зни ве́чныя; Иису́се, победи́телю вся́кия ме́ртвенности, отреби́ е́же изсо́хло е́сть во мне́ от зно́я страсте́й.
Иису́се, кра́сный добро́тою, украси́ мя́ цвета́ми благи́х чу́вств и помышле́ний; Иису́се, бога́тый в ми́лости, уще́дри мя́ плода́ми и́стиннаго покая́ния и пра́вды.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 7.
«И кто́ е́сть предая́й Тя́», — вопроси́вшу ученику́, и́же возлеже́ на ве́чери на пе́рсях Твои́х. — «То́й е́сть, — отвеща́л еси́, — ему́же Аз, омочи́в в соли́ло хле́б, пода́мъ». И омо́чь хле́б, по́дал еси́ Иу́де Си́монову Искарио́тскому, подвиза́я его́ на покая́ние. Он же, ожесточе́н сы́й ду́хом зло́бы, не восхоте́ разуме́ти гла́са любве́ своего́ Учи́теля и Го́спода. Какова́го жестокосе́рдия да бу́ду изба́влен благода́тию Твое́ю, зовя́ Ти́ вы́ну: Аллилу́ия.
Икос 7.
Щадя́ не́мощь естества́ на́шего, отвраща́ющагося вкуше́ния пло́ти челове́ческой, не я́ве, но под ви́дом хле́ба и вина́ благоволи́л еси́ препода́ти на́м Пречи́стое Те́ло и Кро́вь Твою́. Чудя́ся о таково́м снисхожде́нии прему́дрости Твоея́ к не́мощи естества́ на́шего, благода́рне славосло́влю Тя́ си́це:
Иису́се, прему́дре и человеколю́бне стро́яй все́ де́ло спасе́ния на́шего; Иису́се, са́мыя спаси́тельныя та́инства Твои́ приспособля́яй к не́мощи на́шего разуме́ния и чу́вств.
Иису́се, во увере́ние сумня́щихся на свято́й трапе́зе мно́гажды вме́сто хле́ба и вина́, са́мое Те́ло и Кро́вь Твою́ прояви́вый; Иису́се, досто́йным служи́телям алтаря́ Ду́ха Пресвята́го, на освяще́ние даро́в сходя́ща, показа́вый.
Иису́се, вме́сто недосто́йных служи́телей алтаря́ а́нгелов Твои́х неви́димо, для соверше́ния боже́ственнаго та́инства, посыла́яй; Иису́се, явле́нием чуде́с на святе́й трапе́зе мно́гия из са́мых злове́рных к ве́ре обрати́вый.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 8.
«И по хле́бе», си́речь по вкуше́нии от по́даннаго Тобо́ю хле́ба преда́телю, я́коже повеству́ет святы́й Иоа́нн, «вни́де в о́нь сатана́». Оле, стра́шныя ка́зни за неве́рие! Оле, злополу́чнаго жре́бия преда́теля! Еже во спасе́ние долженствова́ло бы́ти, в сме́рть и поги́бель ему́ обре́теся. Пред таковы́м у́бо судо́м пра́вды Твоея́ благогове́я, со стра́хом и тре́петом зову́ Ти́: Аллилу́ия.
Икос 8.
«Сие́ твори́те в Мое́ воспомина́ние», — ре́кл еси́ ученико́м на ве́чери, препода́в и́м под ви́дом хле́ба Те́ло, а под ви́дом вина́ Кро́вь Свою́. «Те́мже у́бо ели́жды от хле́ба яди́м и ча́ши пие́м, сме́рть Твою́ возвеща́емъ», по сло́ву свята́го Па́вла. Воспомина́я у́бо ны́не страда́ния Твоя́, со умиле́нием зову́ Ти́:
Иису́се, в ру́це враго́в Твои́х для спасе́ния ми́ра Себе́ произво́льне преда́вый; Иису́се, легио́ном а́нгелов в защи́ту Твою́ яви́тися не попусти́вый.
Иису́се, неве́рнаго ученика́ воззре́нием на него́ и гла́сом але́ктора к покая́нию обрати́вый; Иису́се, Каиа́фе и Пила́ту, неразу́мно вопроси́вшим Тя́, отве́та не да́вый.
Иису́се, со Креста́ распе́ншим Тя́ у Отца́ отпуще́ние грехо́в проси́вый; Иису́се, Ма́тери Твое́й возлю́бленнаго ученика́ премилосе́рдне усынови́вый.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 9.
«Иу́до, лобза́нием ли Сы́на Челове́ческаго предае́ши?» — воззва́л еси́ го́рце к ученику́ неве́рному, егда́ о́н прии́де со спи́рою в вертогра́д Гефсима́нский, ища́ преда́ти Тя́ лобза́нием. Оба́че и се́й прео́стрый глаго́л не порази́ раска́янием души́, во зле́ ожесточе́нныя. Ве́дый у́бо непостоя́нство и моея́ во́ли, страшу́ся, да не да́м Ти́ когда́ и а́з, неблагода́рный, лобза́ния Иу́дина. Ты́ Са́м у́бо укрепи́ мя́ благода́тию Твое́ю, да со благоразу́мным разбо́йником вы́ну зову́: Аллилу́ия.
Икос 9.
«Отче, да вси́ еди́но бу́дут, я́коже Ты́ во Мне́ и Аз в Тебе́, да и ти́и в На́с еди́но бу́дут, да и ми́р ве́ру и́мет, я́ко Аз от Тебе́ изыдо́хъ», — та́ко возгласи́л еси́ в после́дней вели́кой моли́тве ко Отцу́. Сему́ пресла́дкому гла́су Твоему́ после́дуя и о си́ле моли́твы Твоея́ дерза́я, с ве́рою возглаша́ю Ти́:
Иису́се, вся́ совокупля́яй во еди́но, возсоедини́ все́х на́с неразлу́чне с Тобо́ю и Отце́м Твои́м; Иису́се, вся́ примиря́яй, да́ждь, да бу́дем все́ единомы́сленни в ве́ре и любви́ к Тебе́.
Иису́се, не терпя́й вражды́ и разделе́ний, потреби́ злочести́выя е́реси и раско́лы; Иису́се, все́х любя́й и ми́луяй, собери́ во еди́но ста́до вся́ заблу́дшия о́вцы.
Иису́се, ми́р все́м подава́яй, утоли́ за́висть и пререка́ния между́ призыва́ющими и́мя Твое́; Иису́се, причаща́яй мя́ самаго Те́ла и Кро́ви Твоея́, да бу́ду вои́стину пло́ть от пло́ти Твоея́ и ко́сть от косте́й Твои́х.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 10.
На ве́чери в Ка́не Галиле́йстей, во́ду в вино́ претвори́в, пе́рвое си́м зна́мение Боже́ственныя си́лы Твоея́ показа́л еси́. Отходя́ же на кре́ст, я́ко Жени́х ду́ш, после́днее чу́до любви́ ве́рующим в Тя́ яви́л еси́, претвори́в хле́б в Те́ло Твое́ и вино́ в Кро́вь Твою́, и́мже насыща́яся и а́з в живо́т ве́чный, благода́рне зову́ Ти́: Аллилу́ия.
Икос 10.
В де́нь Воскресе́ния Твоего́, двою́ от учени́к Твои́х спутеше́ствуя во о́бразе стра́нника во Еммау́с, поуча́л еси́ и́х о та́йне страда́ний Твои́х: о́нема же держа́стася о́чи, да Тя́ не позна́ста, а́ще и се́рдце и́х горя́ бе́ в ни́х от сла́дости слове́с Твои́х. Егда́ же прекло́нься на моле́ние и́х, вше́л еси́ с ни́ми облещи́, и благослови́в хле́б, по́дал еси́ и́м: а́бие отверзо́стеся и́ма о́чи, да Тя́ позна́ста. Подо́бясь си́м ученика́м, дерза́ю и а́з со смире́нием вознести́ к Тебе́ сицевы́й гла́с:
Иису́се, долготерпели́вый, не оста́ви и мене́ еди́наго на пути́ жи́зни за ску́дость ве́ры моея́; Иису́се, научи́ мя́, я́коже и о́нех, разуме́ти проро́чествия о Тебе́ и та́йну благода́тнаго соедине́ния с Тобо́ю.
Иису́се, согре́й и воспламени́, я́коже и о́нех ученико́в, и мое́ хла́дное се́рдце; Иису́се преблаги́й, обля́зи и со мно́ю, я́ко уже́ преклони́лся е́сть к ве́черу де́нь моея́ жи́зни.
Иису́се, да́ждь ми́ позна́ти Тя́ вои́стину в настоя́щем преломле́нии та́инственнаго хле́ба и в питии́ от ча́ши; Иису́се, сотвори́, да и а́з, позна́в си́лу любве́ Твоея́, бу́ду провозве́стником о́ныя для бра́тий мои́х.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 11.
Побежда́ющему обеща́л еси́ да́ти я́сти от дре́ва живо́тнаго, е́же е́сть посреди́ рая́ Бо́жия, и от ма́нны сокрове́нныя. К сему́ вкуше́нию на небеси́, да бу́дет ми́ приуготовле́нием на земли́ причаще́ние Те́ла и Кро́ви Твоея́, к нему́же а́з, недосто́йный, ны́не приступа́я, зову́: Аллилу́ия.
Икос 11.
«Яды́й и пия́й недосто́йне, су́д себе́ я́ст и пие́т, не разсужда́яй Те́ла и Кро́ви Госпо́дни», — вразумля́ет приступа́ющих к причаще́нию небоше́ственный Па́вел. Те́мже и а́з страшу́сь и трепе́щу своего́ недосто́инства, но да не надо́лзе удаля́яся Твоего́ обще́ния, от мы́сленнаго во́лка звероуловле́н бу́ду, прихожду́ к Тебе́ со гла́сом таковы́м:
Иису́се, приими́ мя́, я́коже прия́л еси́ мытаря́, блудни́цу и разбо́йника; Иису́се, не возгнуша́йся вни́ти под кро́в души́ моея́, а́ще и ве́сь пу́ст и па́лся е́сть.
Иису́се, разве́рзи и моя́ душе́вныя о́чи, я́коже разве́рзл еси́ сле́пу от рожде́ния; Иису́се, прорцы́ и мне́, я́коже о́ному разсла́бленному: возста́ни и ходи́.
Иису́се, уста́ви то́к нечи́стых пожела́ний души́ моея́, я́коже уста́вил еси́ то́ки жены́ кровоточи́выя; Иису́се, уврачу́й прока́зу души́ и со́вести моея́.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Конда́к 12.
За́вистию диа́вола, усты́ зми́я глаго́лавшаго, ве́сь ро́д челове́ческий вкуше́нием от плода́ запреще́ннаго ра́й погуби́ и сме́рти предаде́ся. Вкуше́нием же от Пречи́стаго Те́ла и Кро́ве Твоея́, вси́ земноро́днии, па́ки ве́чныя сподобля́ются жи́зни и восхо́дят на пе́рвое достоя́ние. Врачество́ бо от я́да змии́на и се́мя безсме́ртия е́сть причаще́ние животворя́щих Та́ин Твои́х. Те́мже благода́рне зову́ Ти́: Аллилу́ия.
Икос 12.
Се́ пред сосу́дом с Боже́ственными Та́йнами Твои́ми предстою́, злы́х же помышле́ний мои́х не отступа́ю; еди́на всемогу́щая благода́ть Твоя́ ободря́ет и привлека́ет мя́. Те́мже, поверга́я себя́ в бе́здну милосе́рдия Твоего́, вопию́:
Иису́се, призыва́яй к поко́ю в Тебе́ все́х тружда́ющихся и обремене́нных, приими́ и мене́, утружде́ннаго суето́ю ми́ра; Иису́се, прише́дый призва́ти не пра́ведныя, но гре́шныя на покая́ние, разреши́ и мя́ от грехо́в и страсте́й мои́х.
Иису́се, исцеля́яй вся́кий неду́г и вся́кую я́зву, уврачу́й ра́ны и гное́ние души́ моея́; Иису́се, насыща́яй а́лчущия, насы́ти мя́ Те́лом и Кро́вию Твое́ю.
Иису́се, воскреша́яй ме́ртвыя, оживи́ мя́, уме́ршаго греха́ми; Иису́се, победи́телю а́да, извлеки́ мя́ из че́люстей ду́ха зло́бы.
Иису́се, Бо́же се́рдца моего́, прииди́ и соедини́ мя с Тобо́ю на ве́ки.
Кондак 13.
О, Пресла́дкий и Всеще́дрый Иису́се! Вы́ну сходя́й, я́ко ма́нна с небесе́, для пита́ния ду́ш и теле́с на́ших в Та́инстве Пречи́стаго Те́ла и Кро́ви Твоея́, сподо́би мя́ неосужде́нно причасти́тися Боже́ственных Та́ин Твои́х, да исцеле́н, насыще́н, освяще́н и обоже́н Тобо́ю на ве́ки, благода́рно зову́ Ти́: Аллилу́ия.
[Се́й конда́к глаго́лется три́жды. И па́ки чте́тся 1-й и́кос: Ангела Твоего́… и конда́к 1-й: Избра́нный Женише́…]
Акафист благодарственный по святом Причащении
Конда́к 1.
Возбра́нный Воево́до и Го́споди, Святы́ми Та́йнами Твои́ми Ты́ а́д в душе́ мое́й победи́л еси́ ны́не! Святы́ми Та́йнами Твои́ми Ты́ тяготу́ грехо́вную с со́вести моея́ непости́жне ны́не сня́л еси́! И а́з, прича́стник Та́ин си́х недосто́йный, похва́льная воспису́ю Ти́ та́ко:
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Икос 1.
Ангели Бо́жии, Серафи́ми шестокрыла́тии, Херуви́ми многоочи́тии, Престо́ли огнезра́чнии, Госпо́дствия, Си́лы, Вла́сти боже́ственныя, Арха́нгели, Ангели вси́! Вы́ ли́ца ва́ша закрыва́ете пред Христо́выми Стра́шными Та́йнами, на Ча́шу с боготворя́щею Кро́вию взира́ете со стра́хом вели́ким и тре́петом. Аз же, смра́дный и гре́шный, к Ча́ше се́й ка́ко дерзну́ приступи́ти, ва́ми, о́гненнии служи́телие Бо́жии, неви́димою си́лою не отри́нутый. Сего́ ра́ди немо́лчным песнопе́ниям ва́шим подража́я, Боже́ственному снисхожде́нию удивля́яся, Го́споду моему́ долготерпели́вому благода́рно вопию́:
Иису́се, Серафи́мами, я́ко любы́ пламенногоря́щая, та́инственно зри́мый, благодарю́ Тя́, я́ко мне́, недосто́йному, любве́ Твоея́ безме́рныя наслади́тися преизоби́льно в Пречи́стых Та́йнах ны́не дарова́л еси́.
Иису́се, Херуви́мами, я́ко Прему́дрость вы́ну светя́щаяся, созерца́емый, благодарю́ Тя́, я́ко Пречи́стыми Твои́ми Та́йнами у́м мо́й к зре́нию неизсле́димыя бе́здны суде́б Твои́х подви́гл еси́.
Иису́се, на Престо́лех огнезра́чных стра́нно почива́яй, благодарю́ Тя́, я́ко во мне́, непотре́бном, Святы́ми Твои́ми Та́йнами, я́ко на Престо́ле Твое́м ны́не неизрече́нно почива́еши.
Иису́се, го́рними чина́ми неви́димо дориноси́мый, благодарю́ Тя́, я́ко мне́, до́льнему, носи́ти Тя́, во мне́ саме́м ны́не благоволи́л еси́.
Иису́се, все́х во́инств непрестаю́щее удивле́ние, благодарю́ Тя́, я́ко ми́лости Твоя́ неисче́тныя на мне́ ны́не удиви́л еси́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 2.
Ви́жду а́з ны́не, я́ко Святы́ми Та́йнами Твои́ми исцеле́н е́смь от прока́зы души́ моея́, сего́ ра́ди прокаже́нному самаряни́ну уподо́бяся, па́даю ни́ц при ногу́ Твое́ю, Иису́се Цели́телю Мо́й, со гла́сом ве́лиим хвалу́ Тебе́ вознося́: Аллилу́ия.
Икос 2.
Ра́зум ники́йже, ни го́рний, ни до́льний, пости́гнути мо́жет, ка́ко Невмести́мый не́бом и не́бом небесе́ Святы́ми Та́йнами Свои́ми вмеща́ешися Ве́сь в мя́. Сего́ Та́инства несказа́ннаго и а́з не постига́я, то́чию Тебе́, Го́спода моего́, в себе́ ны́не ощуща́я, с тре́петом взыва́ю Тебе́ сицева́я:
Иису́се, в Вифа́нии в до́м Ма́рфы и Мари́и вше́дый, благодарю́ Тя́, я́ко в до́м души́ моея́ па́дшия ны́не преми́лостивне вше́л еси́.
Иису́се, с Мари́ею о еди́нем на потре́бу бесе́довавый, благодарю́ Тя́, я́ко и со мно́ю ны́не сла́дце бесе́дуеши, и се́ю сла́дкою бесе́дою мене́, уны́лаго, те́пле утеша́еши.
Иису́се, лозо́ и́стинная, благодарю́ Тя́, я́ко мене́, ро́згу ди́кую, от Тебе́ отпа́дшую па́ки к Себе́ приви́л еси́.
Иису́се, исто́чниче безсме́ртия, благодарю́ Тя́ я́ко мене́ жа́ждою грехо́вною истомле́ннаго, Кро́вию Твое́ю Честно́ю ны́не напои́л еси́.
Иису́се, от блудни́цы лобза́нный, благодарю́ Тя́, я́ко мне́, блу́дному, в Святы́х Твои́х Та́йных да́л еси́ целова́ти Тя́ не то́чию уста́ми, но и душе́ю, и се́рдцем, и все́ю мы́слию мое́ю.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 3.
Си́лою кре́пкою всего́ мя́ испо́лнил еси́, сла́баго, малоду́шнаго, прича́стием Пречи́стых Та́ин Твои́х. Си́ми та́ко на враги́ моя́ ви́димые и неви́димые укрепле́нный побе́дно пою́ Тебе́: Аллилу́ия.
Икос 3.
Име́я неизсле́димую милосе́рдия бе́здну, с мытари́ и гре́шники я́л и пи́л еси́, и а́з ны́не, подо́бный и́м, Трапе́зы Твоея́ Та́йныя стра́нно насыще́нный, Тебе́, моему́ благоде́телю, со умиле́нием восклица́ю:
Иису́се, дру́же мытаре́й и гре́шников, благодарю́ Тя́, я́ко мене́, гре́шнаго, на ве́чере Твое́й та́йной, я́ко дру́га Твоего́ с Собо́ю спосади́л еси́.
Иису́се, у Закхе́я мытаря́ ми́лостивне вита́вый, благодарю́ Тя́, я́ко и во мне́, окая́ннем, ны́не вита́еши и ко исправле́нию мя́ те́м наставля́еши.
Иису́се, тельца́ упита́ннаго Отце́м блу́дному сы́ну закла́ннаго в при́тче изобрази́вый, благодарю́ Тя́, я́ко мне́, блу́дному, Себе́ Сама́го в пи́щу ны́не закла́л еси́.
Иису́се, в Ева́нгелии Твое́м реки́й: «не тре́буют здра́вии врача́, но боля́щии», благодарю́ Тя́, я́ко мене́, всего́ боля́ща, я́звами грехо́вными изъя́звлена, ны́не Та́йнами Твои́ми чуде́сно исцели́л еси́.
Иису́се, Па́стырю до́брый, благодарю́ Тя́, я́ко мене́, овча́ заблу́дшее, ны́не на ра́мена Твоя́ Пречи́стыя ми́лостивно подъя́л еси́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 4.
Бу́ря страсте́й мою́ ду́шу смуща́ше, Ты́ же, Го́споди, во Святы́х Твои́х Та́йнах вше́д в мя́, я́ко не́когда мо́рю волну́ющуся, бу́ре се́й душе́вной запрети́л еси́, глаго́ля: «молчи́, преста́ни», и се́ ны́не тишина́ во мне́ ве́лия, се́ ны́не ми́р Тво́й во мне́, вся́кий у́м превосходя́щий. Те́мже душе́ю умиле́нною Тебе́ воспева́ю: Аллилу́ия.
Икос 4.
Слы́шу а́з, Го́споди, ны́не Пречи́стыя Та́йны прие́м, гла́с Тво́й сладча́йший, в се́рдце мое́м безгла́сно глася́щий вся́ку и́стину, вся́ку пра́вду. Сего́ ра́ди и а́з дерза́ю Тебе́ та́ко возглаша́ти:
Иису́се, Учи́телю благи́й, благодарю́ Тя́, я́ко Та́йнами Твои́ми Пречи́стыми учи́ши мя́ ны́не смире́нию, кро́тости, любви́, сострада́нию.
Иису́се, Пло́ть Твою́, ко Кресту́ пригвожде́нную, стра́нно в пи́щу мне́ да́вый, благодарю́ Тя́, я́ко се́ю пи́щею пло́ть со страстьми́ и похотьми́ распина́ти мя́ укрепля́еши.
Иису́се, со Кресто́м Твои́м на Голго́фу исше́дый, благодарю́ Тя́, я́ко мене́ Святы́ми Та́йнами Твои́ми Кре́ст мо́й терпели́во нести́ ободря́еши.
Иису́се, со Креста́ за враго́в Твои́х моли́выйся, благодарю́ Тя́, я́ко и мене́, прича́стника Та́ин Твои́х, за мои́х враго́в моли́тися призыва́еши.
Иису́се, Те́ло Твое́ и Кро́вь Твою́ пода́вый ми́ во оставле́ние грехо́в, благодарю́ Тя́, я́ко си́ми запове́дуеши ми́ ны́не оставля́ти вся́ согреше́ния, вся́ оби́ды ненави́дящим и оби́дящим мя́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 5.
Боготворя́щую Кро́вь Твою́ Иоа́нн, учени́к Тво́й возлю́бленный, ви́дев, из прободе́ннаго ребра́ Твоего́ исте́кшую, свиде́тельствует о се́м в Ева́нгелии. И а́з ны́не, ви́дев се́й исто́чник безсме́ртия, во все́ существо́ мое́ исте́кший, свиде́тельствую о се́м благода́рственно пе́снию мое́ю: Аллилу́ия.
Икос 5.
Ви́девше тя́ богови́дцы боже́ственнии Моисе́й и Илия́: о́в у́бо ка́мением, о́в у́бо ми́лотию со стра́хом и тре́петом себе́ покрыва́ху; а́з же, окая́нный, в себе́ ны́не Тя́ созерца́я, че́м покры́юся? ра́зве то́лько безме́рною ми́лостию Твое́ю, та́ко взыва́я:
Иису́се, проро́ками предви́денный, благодарю́ Тя́, я́ко зре́ти Тя́ бли́з сподо́бил мя́ в Святы́х Твои́х Та́йнах.
Иису́се, Апо́столами пропове́данный, благодарю́ Тя́, я́ко за Литурги́ей Боже́ственной слу́х мо́й огласи́л еси́ се́ю безсме́ртной Твое́ю про́поведью: «приими́те, яди́те, сие́ е́сть Те́ло мое́, е́же за вы́ ломи́мое во оставле́ние грехо́въ»; «пи́йте от нея́ вси́, сия́ е́сть Кро́вь Моя́, Но́ваго Заве́та, я́же за вы́ и за мно́гие излива́емая во оставле́ние грехо́въ».
Иису́се, му́чениками испове́данный, благодарю́ Тя́, я́ко и мене́ пред Ча́шею Твое́ю си́це удосто́ил еси́ Тя́ испове́дати: «Ве́рую, Го́споди, и испове́дую, я́ко Ты́ еси́ вои́стину Христо́с, Сы́н Бо́га Жива́го».
Иису́се, преподо́бными в моли́твах при́сно призва́нный, благодарю́ Тя́, я́ко во мне́ ны́не, о чесо́м моли́тися неве́дущему, Са́м мо́лишися воздыха́ньми неизглаго́ланными, при́сно взыва́я: «Авва Отче!»
Иису́се, святи́телями и иере́ями на алтаря́х святы́х в Же́ртве безкро́вной приноси́мый, благодарю́ Тя́, я́ко мене́ сама́го алтаре́м Твои́м странноле́пно ны́не соде́лал еси́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 6.
Испове́дую, Го́споди, Твою́ бла́гость, испове́дую Твою́ ми́лость, не таю́ благодея́ний, и́хже оби́льно излия́л еси́ на мя́ во Святы́х Твои́х Та́йнах, пою́ и воспою́ Тебе́: Аллилу́ия.
Икос 6.
Возсия́ во мра́це души́ моея́ со́лнце пресве́тлое от прия́тых ны́не Пречи́стых Та́ин Твои́х. Са́м, све́том небе́сным озаре́нный, взыва́ю:
Иису́се, Све́те ти́хий, благодарю́ Тя́, я́ко во тме́ мне́ све́тиши и тма́ моя́ Тя́ не объя́т.
Иису́се, сия́ние сла́вы Отчия, благодарю́ Тя́, я́ко во све́те Твое́м зрю́ све́т Отца́, све́т Ду́ха Свята́го.
Иису́се, простры́й не́бо я́ко ко́жу, благодарю́ Тя́, я́ко во мне́ само́м, не́бо та́инственно ны́не просте́рл еси́.
Иису́се, Его́же пое́т со́лнце, Его́же сла́вит луна́, Ему́же мо́лятся зве́зды, благодарю́ Тя́, я́ко Святы́ми Твои́ми Та́йнами всего́ мя́ подви́гл еси́ сла́вити Тя́, моли́тися Тебе́.
Иису́се, Женише́ Красне́йший, в полу́нощи му́дрыми де́вами со свети́льниками горя́щими срета́емый, благодарю́ Тя́, я́ко свети́льник се́рдца моего́ пога́сший, па́ки ны́не возже́гл еси́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 7.
Хощу́ а́з, Го́споди, во Святы́х Твои́х Та́йнах Тебе́ ощути́вше, николи́же ктому́ от Тебе́ разлуча́тися, всегда́ в Тебе́ пребыва́ти, всегда́ благода́рне Тебе́ воспева́ти: Аллилу́ия.
Икос 7.
Ди́вны, чу́дны, непостижи́мы Та́йны Твоя́ Пречи́стыя, Го́споди! Ме́ртв бы́в душе́ю, ны́не си́х причасти́вся, живу́ а́з все́м существо́м мои́м. Тебе́ же, Воскреси́телю моему́, с ве́лиим благодаре́нием вопию́:
Иису́се, четверодне́внаго из гро́ба воззва́вый, благодарю́ Тя́, я́ко и мене́, грехо́м возсмерде́вшаго, из гро́ба моего́ смра́днаго ны́не воззва́л еси́.
Иису́се, Исто́чниче приснотеку́щий ве́чныя жи́зни, благодарю́ Тя́, я́ко мене́, нераде́нием от исто́чника сего́ отто́ргшагося, ны́не па́ки с си́м чу́дно возсоедини́л еси́.
Иису́се, пото́к сы́й неизъясни́мыя сла́дости, благодарю́ Тя́, я́ко сла́достию се́ю вся́ вну́тренняя моя́ напо́лнил еси́.
Иису́се, небе́сных чино́в при́сное ра́дование, благодарю́ Тя́, я́ко Святы́ми Твои́ми Та́йнами всего́ мя́, печа́лию пода́вленнаго, ра́дости духо́вныя и весе́лия боже́ственнаго испо́лнил еси́, и та́ко согбе́ннаго подъя́л мя́ еси́.
Иису́се, ско́рбных утеше́ние, благодарю́ Тя́, я́ко мене́, ско́рбию всего́ соугнете́ннаго и стесне́ннаго, на просто́р Тво́й широ́кий и благода́тный ны́не изве́л мя́ еси́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 8.
Стра́нно ны́не, Христе́, по глаго́лу Твоему́: «Ты́ во мне́ пребыва́еши, и а́з пребыва́ю в Тебе́», стра́нно, я́коже Симео́н пра́ведный, ны́не держу́ Тя́! О, Го́споди мо́й, Го́споди, что́ е́смь а́з, я́ко та́ко посеща́еши мя́! Таково́ю сла́вою и че́стию от Тебе́ венча́н, благода́рно Тебе́ восклица́ю: Аллилу́ия.
Икос 8.
Ве́сь, я́ко желе́зо раскале́нное огне́м проника́ет, ны́не напо́лнен, насыще́н Тобо́ю, Го́споди Бо́же! Ны́не позна́х, я́ко вои́стину Тво́й е́смь а́з, и сего́ ра́ди си́це воспева́ю:
Иису́се, Имже благода́ть и и́стина бы́сть, благодарю́ Тя́, я́ко от исполне́ния Твоего́ и а́з ны́не прия́х благода́ть возблагода́ть.
Иису́се, Уме преве́чный, благодарю́ Тя́, я́ко Святы́ми Та́йнами Твои́ми у́м мо́й го́рняя му́дрствовати возбуди́л еси́.
Иису́се, Прекре́пкий, благодарю́ Тя́, я́ко во́лю мою́, грехо́м разсла́бленную, ди́вно ны́не укрепи́л еси́.
Иису́се, Обнови́телю ду́ш на́ших, благодарю́ Тя́, я́ко мя́, безме́стными дея́ньми обветша́вшаго, чу́дно ны́не обнови́л еси́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 9.
Все́ естество́ мое́, Го́споди Иису́се Христе́, от посеще́ния Твоего́ ми́лостиваго, ны́не лику́ет, игра́ет, пра́зднует, весели́тся, велича́ет Тя́, пое́т Тебе́ пе́снь побе́дную: Аллилу́ия.
Икос 9.
Вити́йствовати не мо́гут ни язы́к челове́ческий, ни а́нгельский вели́чия Та́ин Пречи́стых Твои́х, Го́споди! Ка́ко под ви́дом хле́ба Те́лом Твои́м Пречи́стым напита́л мя́ еси́. Ка́ко под ви́дом вина́ Кро́вь Твою́ боготворя́щую по́дал мне́ пи́ти! О, Го́споди Живы́й, со тре́петом Тебе́ вопию́:
Иису́се, творя́й чудеса́ Еди́н, благодарю́ Тя́, я́ко во мне́ саме́м чу́до ны́не преве́лие сотвори́л еси́.
Иису́се, исполня́ющих во́лю Твою́ сро́дниками Твои́ми именова́вый, благодарю́ Тя́, я́ко мене́ прия́тием Та́ин Твои́х сокро́вным и сотеле́сным Тебе́ ны́не соде́лал еси́.
Иису́се, Бо́же непостижи́мый, благодарю́ Тя́, я́ко мне́ дарова́л еси́ бы́ти ны́не о́бщником Боже́ственнаго естества́.
Иису́се, со Апо́столами Твои́ми в го́рнице Сио́нской вечеря́вый, благодарю́ Тя́, я́ко в душе́ мое́й убо́гой го́рницу Себе́ ны́не устро́ил еси́.
Иису́се, но́ги ученико́м на ве́чери умы́вый, благодарю́ Тя́, я́ко Та́йнами Твои́ми всего́ мя́ от скве́рны пло́ти и ду́ха, ны́не омы́л еси́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 10.
Спаси́телю Бо́гу, Та́йны Своя́ Пречи́стыя в пи́щу мне́ дарова́вшему и Си́ми мене́ обожи́вшему, пою́: Аллилу́ия.
Икос 10.
Царю́ Небе́сный, смири́вшийся смире́нию моему́, хвале́бную пе́снь Тебе́, недосто́йный а́з, приношу́:
Иису́се, Его́же Ца́рство все́х веко́в и влады́чество во вся́ ро́ды и ро́ды, благодарю́ Тя́, я́ко Ца́рство Твое́ вну́трь мене́ устро́ил еси́.
Иису́се великодарови́тый, благодарю́ Тя́, я́ко пра́вду, ми́р и ра́дость Ца́рствия Твоего́ восчу́вствовати се́рдцем мои́м ны́не дарова́л еси́.
Иису́се всеще́дрый, благодарю́ Тя́, я́ко щедро́ты Твоя́, я́ко до́ждь благода́тный, оби́льный, на мя́ ны́не в Та́йнах Пречи́стых излия́л еси́.
Иису́се, сокро́вище на небеси́ иска́ти повеле́вый, благодарю́ Тя́, я́ко сокро́вище честне́йшее, Святы́я Та́йны Твоя́, прия́ти мя́ ны́не сподо́бил еси́.
Иису́се, от волхво́в поклоне́ние с да́ры прие́мый, благодарю́ Тя́, я́ко мне́ да́л еси́ ны́не поклоня́тися Тебе́, во Святы́х Твои́х Та́йнах.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 11.
Пе́ние та́инственное, сокрове́нное, сла́дкое, а́нгельское слы́шу а́з ны́не в душе́ мое́й, Го́споди. Пое́т душа́ моя́, Тобо́ю исцеле́нная. Пое́т душа́ моя́, Тобо́ю просветле́нная. Пое́т душа́ моя́, Тобо́ю обоже́нная. Пое́т душа́ моя́, Тобо́ю горе́ вознесе́нная. Пое́т Тебе́ душа́ моя́, Тя́ прие́мшая. Пое́т Тебе́ пе́снь: Аллилу́ия.
Икос 11.
Све́та Пода́телю и все́х веко́в Тво́рче, Го́споди, во Све́т Тво́й ны́не призва́л мя́ еси́, сы́ном Све́та мя́ ны́не странноле́пно соде́лал еси́. Тебе́, Све́ту ми́ра, све́тло вопию́ а́з:
Иису́се, одея́йся све́том я́ко ри́зою, благодарю́ Тя́, я́ко ри́зу Твою́ све́тлую мне́, помраче́нному, по́дал еси́.
Иису́се, с Моисе́ем и Илие́ю на Фаво́ре бесе́довавый, благодарю́ Тя́, я́ко со мно́ю, недосто́йным, сла́дце и пресла́дце ны́не бесе́дуеши.
Иису́се, о́блаком све́тлым наро́д Тво́й дре́вле води́вый, благодарю́ Тя́, я́ко мене́ Та́йнами Твои́ми приве́л ны́не в поко́й Тво́й жела́нный.
Иису́се, пра́ведныя Твоя́ просвеща́я я́ко со́лнце, благодарю́ Тя́, я́ко мене́ просвети́л еси́ ны́не ко зре́нию всего́ убо́жества и ничто́жества моего́ пред вели́чием сла́вы Твоея́.
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 12.
Благода́ти Пресвята́го Ду́ха ве́лия, пречу́дныя, пресла́вныя, непостижи́мыя, от Даро́в Святы́х исходя́щия, гре́х мои́х ра́ди не возбрани́л еси́ посети́ти мене́, Бо́же мо́й, благода́ть сию́ ту́не мне́ да́вый, приими́ от мене́ пе́снь сию́: Аллилу́ия.
Икос 12.
Пою́ще любо́вь Твою́ неизме́римую, в Святы́х Та́йнах мне́ ны́не явле́нную, благода́рною мы́слию, благода́рным же се́рдцем, благода́рными же удесы́ души́ и те́ла моего́ велича́ю и си́це славосло́влю Тя́, Бо́же мо́й:
Иису́се, ученико́м Твои́м по Воскресе́нии яви́выйся, благодарю́ Тя́, я́ко и мне́ окая́нному во святы́х Твои́х Та́йнах ны́не яви́лся еси́.
Иису́се, Апо́столом Твои́м ми́р препода́вый, благодарю́ Тя́, я́ко всю́ ду́шу мою́ ми́ром неизрече́нным ны́не испо́лнил еси́.
Иису́се, Луко́ю и Клео́пою в преломле́нии хле́ба позна́нный, благодарю́ Тя́, я́ко и мне́, недосто́йному, в Святы́х Твои́х Та́йнах да́л ны́не позна́ти сла́дость Твою́, ми́лость Твою́, снисхожде́ние Твое́ стра́нное.
Иису́се, Фомо́ю осяза́нный, благодарю́ Тя́, я́ко мне́, малове́рному, да́л еси́ осяза́ти Тя́ во Святы́х Твои́х Та́йнах, осяза́ти ре́бра Твоя́, ру́це Твои́, но́зи Твои́, Го́споди.
Иису́се, Фомо́ю Го́сподом и Бо́гом испове́данный, благодарю́ Тя́, я́ко вся́ душа́ моя́, все́ се́рдце мое́, вся́ чу́вства моя́, все́ существо́ мое́, Тобо́ю ны́не объя́тое, ве́рою несумне́нною Тебе́ ны́не восклица́ет: «Госпо́дь мо́й и Бо́г мо́й».
Иису́се, Хле́бе Живы́й, Хле́бе Небе́сный, Хле́бе Сладча́йший, благодарю́ Тя́ за Та́йны Святы́я Твоя́.
Конда́к 13.
О, Иису́се мо́й, Хле́бе Живы́й, Хле́бе Небе́сный, Хле́бе Сладча́йший, Хле́бе Превожделе́нне, Тобо́ю пита́ются Ангели на небесе́х преизоби́льно. Благодарю́ Тя́, я́ко и а́з, стра́нник и пришле́ц на земли́ сы́й, насы́тился ны́не Тобо́ю! О, Пи́ще моя́ кре́пкая, Питие́ неисчерпа́емое, Исто́чниче безсме́ртия и Жи́зни Пода́телю. О, Па́сха та́инственная, Па́сха Всечестна́я, Па́сха Непоро́чная, пода́вай мне́ и́стее Тебе́ причаща́тися в невече́рнем дни́ Ца́рствия Твоего́, пода́вай мне́ пе́ти Тебе́ во ве́ки вся́ неисче́тныя пе́снь вели́кую, в вы́шних трегу́бо песносло́вимую: Аллилу́ия, Аллилу́ия, Аллилу́ия.
[Се́й конда́к глаго́лется три́жды. И па́ки чте́тся 1-й и́кос: Ангели Бо́жии… и конда́к 1-й: Возбра́нный Воево́до и Го́споди…]